اسمك ايه؟
اكيد مش حنفي ...اسمي فوق موجود عالبلوج يسد عين الشمس
سنك كام؟
22 سنه عقبال عندك
ايه لونك المفضل؟
الاحمر .رغم انه احيانا بينرفزني.ومتسئلنيش ازاي.وكمان الاصفر والبينك
برجك وتاريخ ميلادك؟
برج الحمل......14-4
ايه هو برجك المفضل؟
الثور
ايه هي عيوبك؟
كتيييييييييييييييييييييييييييييير .كسلانه جدا وبطيئه اوي ولما اتعصب ببقي غبيه .وبغرق في شبر ميه .وكفايه عليك كده
ايه هي مميزاتك؟
مش هقولك كتير.بس محدش بيعرف يقول مميزات نفسه ..بس كلهم بيقولولي ان انا طيبه وحنينه جدا
اكتر حاجه بتحبيها فيكي؟
بحب نفسي اوي وانا بضحك من قلبي وبهزر
اكتر حاجه بتكرهيها فيكي؟
مش بعرف ازعل من حد .يعني لو حد عمل فيا حاجه ضايقتني مش باخد منه موقف او ازعل بفوتلو وخلاص.وده طبعا بيبقي علي حساب اعصابي
اكتر حاجه بتكرهيها عامه؟
الخروج في الحر والشمس مهما كانت الظروف
اكتر حاجه بتحبيها؟
بحب اوي اكون نايمه والدنيا ضلمه خالص ويكون الجو حلو مش حر طبعا واشغل الاف ام...ممكن انام 3 ايام متواصله
عاده سيئه نفسك تبطليها ومش عارفه؟
النوم الكتير والبطيء
عاده نفسك تكتسبيها؟
السرعه.نفسي انجز حاجتي بسرعه
اكلتك المفضله؟
طبعاااااااااااااا البطاطس المحمره بلا منافس والمكرونه ويكون جنبهم اي نوع لحوم .لحمه .فراخ.كبده.بنيه...وده طبعا بما اني مش بحب الخضار اطلاقا وبكل انواعه.وعشان كده تلاقيني مش بحتاج اعمل رجيم خالص ومش بعاني من اكل البطاطس ههههههههههه
اكتر مشروب مفضل ليكي؟
الموز باللبن.الفراوله باللبن.عصير الرمان.والنسكافيه.واخيراااااااااااااااا البيبسي وما ادراك ما البيبسي
عدد اسرتك كام؟
اربعه.ربنا يخليهم ليا
اكتر مكان بتحبي تروحيه؟
اي مكان يكون في بحر وتكون الدنيا ليل...بجد احساس روعه
وطبعا بيت تيتا مامه ماما بما انه بيبقي هدوء جدا ومفهوش زحمه خااااااالص...اللهم لا حسد
اكتر مكان بتكرهي تروحيه؟
اي مكان احس ان انا بروحه غصب عني مثلا المدرسه او الجامعه وطبعا مش بكرهم بس كنت بحس انهم مقيدين حريتي
اكتر مكان بتكوني مرتاحه فيه؟
طبعا بيتي وخاصه الاوضه بتاعتي وخاصه بقي السرير ...ياسلااااااام
اكتر مكان بتحبيه في مصر؟
طبعا مطرووووووووح وحبيبتي اسكندريه
بتعرفي تطبخي؟
.انا الاول كان كبيري اعمل شاي لكن في ظروف جدت خليتني ابقي ست بيت شاطره اوي وخاصه في المطبخ
ايه هي الظروف دي؟اتخطبتي مثلا؟
وانت مالك ماتبقاش حشري
اكتر اكله بتعرفي تعمليها؟
الملوخيه والرز.وطبعاااااااااا المكرونه والبطاطس المحمره.وكل اللحوم وكل النواشف.
اكتر حاجه مبتعرفيش تعمليها في البيت؟
والله انا اعمل اي حاجه .بس اجي عند موضوع فك الستاير ده وبخاف بما اني كل مره اطلع علي السلم عشان افكهم لازم اقع معرفش ليه...نصاحه بقي تقول ايه
انتي مرتبطه؟
مالكش فيه.وبعدين مش شغلك
طب بقالكم كام سنه عارفين بعض؟
قلتلك مالكش فيه.يعني انت هتستفاد ايه مرتبطه ولا لاء.بترسم عليه مثلا وعينك مني.ولا عندك عريس
كان في حب اول؟
اكيد طبعا مفيش حد معندوش حب اول
الحب الاول هو الحب الحقيقي موافقه ولا لاء؟
لا طبعا لان اي حب الواحد بيتعرضله سواء اول او تاني بيكون حاسس انه هو الحب الحقيقي حتي لو القصه دي مكملتش .وفي الاخر الحب الحقيقي هو اللي هيستمر لغايه الجواز ان شاء الله
بتحبي مين اكتر ماما ولا بابا؟
طبعا الاتنين ربنا يخليهم ليا .بس طبعا ماما حبيبه قلبي بس عصبيه اوي بس كل مانتخانق لازم نتصالح بسرعه... وبابا حبيبي قلبي بردوا وبحبه علشان علطول بضحك عليه وباخد منه فلوس بالعبط.
مين اقرب حد ليكي؟
كل الناس قريبين ليا.صحابي وطبعا اهلي وقرايبي.ولكن اقرب حد ليا حبيبه قلبي اختي شيمو الصغيره حبيبه قلبي هي مش صغيره اوي بس الفرق بنا سنه واحده .اه هي عصبيه شويه بس حبيبتي
مواصفات فارس احلامك؟
سؤال غبي جدا.لان طبيعي هقول كل حاجه حلوه .ومش هقولك عايزاه صايع مثلا
انتي فتاه مثاليه؟
لا طبعاااااااااااااااااااا.بس اتمني
اكتر حد بتحبيه في قرايبك؟
اكتر حد بتحبيه في قرايبك؟
بص ياسيدي انا بحب دينا تؤام روحي طبعا.كمان بحب هبه .وبحب غاده .كمان بحب اسماء ....انت فاضي ولا وراك حاجه....كمان بحب مروه وبمووت في ياسمين وبحب مني وطبعا هند وتصدق كمان بحب ريم وبحب سوزي..ها زهقت...طب كفايه كده انهارده
حد متستغنيش عنه؟
ماما وبابا وشيمو وكمان.......................ومتسئلنيش علي مين النقط دي لاني هحرجك زي كل مره واقولك انت مالك
اكتر حد بتحبيه في صحابك؟
ايمي ورانيا وخالد
يوم تتمني انه ميتكررش؟
يوم الحادثه بتاعت ماما وبابا
يوم تتمني انه يتكرر تاني؟
هو يوم انا نفسي يتكرر بس مش بنفس المواصفات .هو يوم فرح هند بنت خالتي كان يوم حلو اوي ويارب يتكرر تاني وعقبال كل بنات العيله وعقبالي طبعا
عايزه تتجوزي؟
لا ناويه اعنس...اكيد مفيش بنت مش عايزه تتجوز
يوم كنت حاسه انك لوحدك؟
يوم الحادثه بتاعت بابا وماما.رغم ان الناس كلها كانت معايا والعيله كلها كانت جنبي .بس كنت محتاجه اوي حد منهم سواب بابا اوماما يبقي واقف جنبي
بستعملي الموبايل من كام سنه؟
من وانا في تانيه ثانوي
مين كان جايبهولك؟
بابا
كان بكام ونوعه ايه؟
ليه هتدفعلي حقه...وكان 3410 نوكيا
اكتر حاجه بتستغلي فيها وقت فراغك؟
النووووووووووم
اهلاويه ولا زملكاويه؟
طبعا اااااااااااااااااا اهلاويه.عفوا الاهلي اهلي.وبعدين احب الفت نظر سيادتك لحاجه ان السؤال ده بقي موضه قديمه دلوقتي بقي
اسمه انت اهلاوي ولا مالكش في الكوره...ال زمالك ال .معلش يا ماما حقك عليا
بتشجعي مين في الكوره بره مصر؟
بموووووووووووووت في ايطاليا والبرتغال
مطربك العربي المفضل؟
طبعا وبلا منازع شيرين.وكمان بحب عمرو وتامر ومنير
اغنيتك المفضله؟
اغنيتك المفضله؟
مش عايزه غيرك انت
مطربك الاجنبي المفضل؟
طبعا جورج ماايكل...فظيع
افضل نوع عربيه؟
والله مفيش حاجه معينه بس غالبا النيسان
انتي بتكدبي؟
ههههههههههههه.لو سئلتك انت بتكدب وقلتلي لا هقولك انت كداب.مفيش حد مبيكدبش
ندمانه علي حاجه معينه؟
اه طبعا.واشد الندم
اه طبعا.واشد الندم
طب هي ايه؟
منا قلتلك خليك في حالك ومتبقاش حشري.ندمانه وخلاصايه امنياتك؟
طبعا في المقام الاول بابا وماما ربنا يديهم الصحه ويرضوا عليا اكتر.حبيبتي شوشو ربنا يكرمها.وطبعا اي حد بحبه ومش بحبه ربنا يكرمه.
اعتذار؟
اي حد زعل مني او ضايقته او قصرت معاه بقصد او بدون قصد
رساله شكر؟
لبابا وماما واي حد ساعدني عشان ابقي كويسه
رساله عتاب؟
عفي الله عما سلف
طولت عليكي؟
اه اوي
زهقتي مني؟
اوي اوي اوي
تتمني نتقابل تاني؟
ارجوك بلاش
3 comments:
hi ya nana
ازيك يانانا.البوست جميل بجد هي دي حنان اللي انا عرفاها.وعلي فكره في كمان حاجات كتير نانا مش كاتبه عليها اوي.يعني مثلا حنان مدمنه كره قدم وماتشات وعندها استعداد تأجل اي مواعيد او اي خروجات عشان خاطر اي ماتش وخاصه الدوري الانجليزي.وكمان حنان بطيئه جداااااااااا.يعني لو هنخرج لازم نصحيها قبل معاد الخروج بتلات او اربع ساعات عالاقل.كمان حنان شاطره اوي في المطبخ واسرع حاجه بتعملها الاكل.وفعلا اي حد عارف نانا بيحب يشوفها وهي بتضحك وبتكرر بتبقي عسل ودمها عسل..
وفي الاخر بجد نانا دي اطيب واحن واحده عرفتها في حياتي بجد مش عشان صحاب
باي يا نانا
ezeik ya nana
مفيش اي كلام خالص هقوله غير..هي دي حنان اللي انا عارفاها واللي اي حد عايز يعرفها
thanks
kfaya ya emmy fdaye7
Post a Comment