البعض بيقول انها حاجه عاديه ومش لازم نكبر الموضوع والمسائل ونقول في ازمه صداقه بين شباب وفتيات هذا الجيل ..والبعض الاخر يؤكد انها مشكله من العيار التقيل ممكن تطور للاخر ..لان الحكايه في البدايه بتكون مجرد بلوك علي الايميل وبعدها ممكن ميردش علي رقم تليفونك وبعدها ممكن بردوا يقول لأخته لو فلان كلمني ياريت تقولي له اني مش موجود وبعدها انت في طريق وانا في طريق ياحبي......حد فاهم حاجه....عموما انت عمرك فكرت تعمل بلوك لاحد من صحابك علي الايميل ؟ولو فكرت ياتري كان ايه السبب وقتها؟وهل البلوك علي الايميل يعتبر احدي المؤشرات السلبيه لعلاقتك بصحابك؟ام انه مجرد اجراء روتيني تتخذه بحثا عن الهدوء والتركيز بعيد عن وجع الدماغ والوش والتشتت الذهني اللي ممكن يحصلك بسبب الكلام مع اكتر من حد في وقت واحد؟فكر شويه وبعدين قول رايك....وانا طبعا بما اني بوشين فعندي مليون رأي في الموضوع ده أولا.....احيانا بحتقر نفسي لما بعمل الحركه دي لاني بحس اني معنديش الشجاعه وجبانه وبتكسف اقول لحد اني مشغوله ومينفعش اتكلم معاه في الوقت .لكن ساعات بيكون البلوك افضل حل للتركيز....ثانيا.....او الوش التاني.....ساعات مش بستخدم البلوك الا بسيط اوي ومع شخصيات مينفعش معاها غير كده.لانهم ساعات مبيحترموش اني مشغوله او اني بتكلم مع حد تاني في موضوع مهم .وناس تاني بقي تاخدهم الجلاله علي النت وهاتك يانكت بايخه واستظراف مالوش لازمه.ثالثا...او الوش التالت وده طبعا هو الصح.سيبكو بقي من الكلام اللي بيقول باعمل بلوك لما اكون مشغول او لما احب اركز في الكلام مع واحد او اتنين يالكتير لان وسوري في اللفظ يعني (البنات الاوكش) بيكونوا هما السبب طبعا اللي بيخلوا الشباب يعملو بلوك علي صحابهم.عاملين بمبدا احمد السقا في فيلم همام في امستردام(الراجل بمليون ست ولو جت الست طز في الراجل). وطبعا انا مش بعمل بأي واحد منهم..لاني بفضل اني انفض لاي حد من غير معمل بلوك عشان محدش يزعل مني...وطبعا المشكله بتخلي قرايبي وصحابي مخنوقين مني جدا
No comments:
Post a Comment