مغامراتنا في اسكندريه

فجأه وبدون سابق انظارحدث مايلي...في الاربعاء الموافق 25_7

بابا:يله هتسافروا اسكندريه انهارده اجهزوا

احنا:ياسلام انت تؤمر ياباشا ده عز الطلب

وكان هناك في مجموعه سافرت قبلنا وكانوا المفروض انهم مستنيينا

المهم وصلنا اسكندريه الساعه 12 بليل.والمفروض ان احنا كنا هنقعد في شقه المندره بس جدت ظروف ومنفعش المهم روحنا هنقعد في شقه (خالتو)في ميامي.ايه يعني في الدور السابع والاسانسير عطلان عادي.ايه يعني الجو حر موووت ولا تكييف ولا غيره عادي يعني هو الجو في مصر اللي عدل اوي.ايه يعني بقي الشقه زحمه موووت ولازم تحجز مكان تنام فيه يا اما هتتسوح وايه يعني لما تقف علي الحمام بالطابور عادي اهه بردوا تغيير

فيها ايه لما البواب يقفل باب العماره الساعه 12 بليل واي حد ييجي بعد كده يدخل بالمفتاح.علي العلم ان احنا معناش غير نسختين وبس ده الي جانب ان حماده (ابن خالتو)خد نسخه منهم معاه مصر وهو نازل في اول يومين يعني احنا كملنا الاسبوع بمفتاح واحد يعني لو جيت متاخر اقعد دور علي حد يفتحلك او يسئل فيك.عادي عادي ده مصيف والله

(علي فكره انا بحب شقه اسكندريه دي موت ومقدرش اروح اسكندريه من غير ما اقعد فيها يومين تلاته عالاقل انا بس بفضفض)

ماعلينا...اول يوم...عدي عادي بما اننا كنا تعبانين من السفر وتعبانين اكتر من السلم

تاني يوم بقي....عمو محمد(جوز خالتو)بيصحينا عشان نروح البلاج المهم صحينا ونزلناوروحنا البلاج اللي قدام البيت علطول وكان معانا خالو محسن ولعبنا كره في الميه اينعم بابا ضحك علي خالوا وادالوا فريق المكسحين بس عادي لعبنا وانبسطنا واليوم خلص

بليل بقي حمودي(ابن خالتو)ايه رائيكوا ياشباب نروح المعموره...والله فكره وروحنا المعموره

هناك بقي مينفعش تمشي خطوه من غير ماتدفع رسم دخول معرفش ليه ولا كانك في ديزني لاند.داخل بالعربيه ....ادفع.داخل علي رجلك ...ادفع.عند البوابه الرئيسيه...ادفع.بوابه الملاهي...ادفع.هتركب لعبه بردوا...هتدفع.مش عاجبك...روح.المهم ان احنا ننبسط

كلنا طبعا رايحيين عشان نركب المنخل.انا بصراحه عمري ماركبته لاني بخاف منه جدا.المهم غاده(بنت خالو)اقنعتني اني اركب وقالتلي اني هنبسط اوي بصراحه مكنتش عارفه اني هنبسط اوي كده وخاصه ظهري انبسط جدا هو وكتفي..يعني انبسطوا لغايه ما ازرقوا وورموا ههههههههه تغييييييييييييييييير ده احنا في مصيف

واللي حصل بقي...ايه يعني اما اسماء وياسمين يمسحوا ارض المنخل.وفيها ايه لما تكون دينا قاعده في المكان اللي قصادي من الناحيه التانيه وفجأه وبقوه الدفع الاقيها ماسكه في البنطلون وبتقولي الحقيني ..عادي

وايه يعني لما مروه تقع كل شويه علي العلم ان حمودي ماسكها بس غالبا هي غاويه بهدله.وفيها ايه كمان لما شوشو (اختي) تتدحرج من علي الكرسي علي الرغم من ان حمودي ماسكها بردوا ولا غاده اللي اقنعتني اني اركب متشفهاش وهي مترنحه علي الارض .وفيها ايه بقي لما حماده يحب يعمل منقذ ماهو شايف بنات خالتو اتبهدلو فعايز يساعد..وياريتو ماساعد مفيش حد في المنخل متخبطش فيه واخير لقي نفسه علي حجر هبه عادي جداااااااااااا

والحمد لله نزلنا واحنا مضحضحين.وبعدين ركبنا لعبه تانيه كده مش فاكره اسمها ايه.المهم قلتلهم ياجماعه هي اللعبه دي بتدوخ.قالولي لا دي بس بتخلي الواحد يحس ان في حد بيزغزغوا.قلت وماله اركب.وركبت

وياريتني ماركبت.مش عارفه انا ايه اللي خلاني اتزغزغ في نافوخي واركبها.لقيت نفسي في اول طالعه اغمي عليا وبما اني كنت راكبه جنب حمودي .فهو متعود عليا ان انا بدوخ بسرعه فعادي سبني ومسئلش فيا وعمال هو يضحك لغايه مانزلنا.فيها ايه اما تطلع اللعبه سليم وتنزل مغمي عليك.عادي تغيير دانت في مصيف يا اخي.ونزلنا واستريحنا شويه وروحنا تاني نركب المنخل قبل مانمشي وطبعا خدنا علقه حلوه زي اللي خدناها اول مره من الخبط عادي .ابتسم انت في المعموره.المهم خلاص روحنا وطبعا متنسااااااااااااش السلم دول سبع ادوار ياجماعه الي جانب بقي الزرقان والخضران اللي فينا من المنخل فيها ايه احنا في مصيف وعايزين نحس بتغيير

وعدي بقي باقي الاسبوع عادي.بس كده كان في شويه حركات ارعه

مثلا مني(بنت خالتو) كانت مقضياها نوم معرفش ليه.الصبح نصحيها نقولها يالا عشان ننزل البلاج تقول لا مش هينفع انا هقعد الصبح عشان اعرف اخرج معاكوا بليل نقولها اوك.نيجي بليل يالا يامني هنخرج تقولنا لا انا تعبانه مش هقدر انزل معاكوا عشان اعرف انزل معاكوا الصبح البلاج.معرفش في ايه اكيد كانت بتنزل وهي نايمه.

اما بقي ياسمين ومروه كانوا تخصص تحضير الفطار وساعات تخصص خناق

اما شوشو الوحيده اللي كانت مقضايا بالطول والعرض فعلا جايه تغير جو تخرج مع صحابها عالبلاج الصبح وتنزل معاهم بليل الحياه حلوه اوي عندها

اما بقي ديناااااااااااااااااااااااا.الفوتوجرافر الجامده مووووووت صاحبه احلي صور واحلي كادرات واحلي زكريات وعلي فكره هي اللي مصوره الصور اللي انا منزلاها في البوست ده والصوره ديه دينا صورتها واحنا عند الجزيره اول مره قبل ماتكبر في دماغنا ودخلها عوم.ده طبعا بقي غير باقي الصور التانيه والفديوهات الجامده .

اما بقي اودي وبعذء(ولاد خالتو)كانوا ياما يتخانقوا مين اللي ينزل .يجيب الطلبات من تحت وده طبعا عشان السلم.او يطلعوا يصفروا من البلكونه للبت عليا عشان تطلع(واحده كان بيحاولوا يظبطوها بس ولا سئلت فيهم).عادي يعني

انا بقي كنت مع الطايفه نازلين انزل طالعين اطلع مفيش اي مشكله ده الي جانب البلكونه كنت مأجراها منهم بليل وبالنهار

وده طبعا بما انها هي المكان الوحيد اللي الواحد ممكن لما يجيلوا مكالمه يطلع فيها حيث الهدوء ههههههههههههههههه ولا ايه يا دينا؟...وطبعا مني حبيبتي كنا لازم كل يوم الصبح من الساعه خمسه للساعه سبعه او تمانيه قاعدين في البلكونه وبنضحك علي حاجه كده هي عارفاها هتبقي تقولكوا عليها

طبعا بما ان البلكونه مشغوله اربعه وعشرين ساعه ولا اكنها سنترال .بردوا اللي هيعمل مكالمه يبقي بالحجز

وفي يوم نزلنا البلاج وقعدنا شويه ولقينا نفسنا زهقانين.دينا عرضت علينا ان احنا نقوم نتمشي شويه.المهم خرجنا بره البلاج واتمشينا شويه في خالد ابن الوليد وكمان روحنا بير مسعود وبعدين واحنا ماشيين لقينا واحد عرض علينا نركب لانش في البحر وقال انه هيلففنا شويه في البحر ويودينا عند الجزيره قلنا اوك وركبنا وبجد منظر الميه جوه كان تحفه وبعذء واودي نزلوا عند الجزيره وقالوا ان الميه تجنن والعوم هنا تحفه.المهم خلاص خرجنا واتفقنا اننا هانيجي البلاج ده بكره ومعانا الناس الكبار(اهلنا يعني)والراجل يدخلنا عند الجزيره ونتفق معاه يرجع ياخدنا في اي وقت علي اساس ان الجزيره فيها ناس كتير جوه عاملين كده والجو جوه طبعا احسن

وخلاص روحنا وارتحنا وخرجنا بليل.مروه ..ايه رائيكوا ياجماعه تركبوا خيل .طب وماله نركب وركبوا وانبسطوا جدا وكمان البناطيل انبسطت جدا بعد ما اتقطعت من المسامير اللي في ظهر الحصان(الحمد لله انا مركبتش)..احسن

جه بقي يوم الخميس وروحنا البلاج وانتوا عارفين ان احنا كان لينا مزاج نروح الجزيره اوي واليوم ده كان البحر هادي ومفيش موج وكنا كمان شباب بس معناش حد كبير غير بابا وماما كانوا قاعدين في كافي شوب قدام البلاج يعني كمان محدش هيحس بينا يعني هندخل هندخل مفيش تفاهم

وفعلا جبنا عوامه عشان اللي يتعب فينا يريح عليها والمهم بابا اكد علي اودي محدش يروح الجزيره وطبعا لاحياه لمن تنادي.قلنا هندخل كلنا علي العلم ان مروه مبتعرفش تعوم اوي او مبتعرفش اصلا.فيها ايه يعني لما تحس انها تعبانه تقوم متشعلقه علي اي حد فينا واقف جنبهاومغطساه تحت عادي.وفيها ايه كمان لما ندخل كاملين ونخرج ناقصين واحد ولا اتنين ولا حتي تلاته اهه برده تجديد محنا كل مره ندخل ونخرج كاملين مجتش بقي علي المره ديه.وعشان كده قررنا مناخدش مروه معانا جوه وخليها بره مع رنا عشان كمان رنا مش هتعرف تدخل ومحدش هيعرف ياخد باله من حد وكفايه عليه مسؤليه نفسه.وعلي العلم انهم مكنوش عايزين يخدوني عشان كان عندي برد جامد.

المهم ابتدينا الرحله للجزيره وطبعا انا كنت اخر واحد بما اني كان عندي برد جامد مووت وانفلونزا وكحه ومناخيري مسدوده من الناحيتين بس اودي كان قريب مني عشان ياخد باله مني.وخلاص كلهم وصللوا للجزيره وطلعو وانا كان خلاص فاضلي حوالي تلاته او اربعه متر عليها وقلتلهم خلاص انا مش قادره اتحرك خطوه واحده تاني وكمان محمد كان تعب وعايز يطلع فطبعا دينا حبيبتي ساعدتني عشان اطلع الجزيره.وبجد كنا مبسوطين جدا من الجو جوه والهدوء ومنظر البحر وطبعا احنا جوه مهيصين ومش عارفين ايه اللي بيحصل بره.انا بقي هقلكوا ايه اللي كان بيحصل بره

بابا دخل البلاج عشان يطمن علينا(الراجل كان قلبه حاسس)شاف مروه ورنا قاعدين لوحدهم سئلهم مروه ام نص لسان قالتلوا ان احنا دخلنا الجزيره وطبعا بما انها كانت مفروسه مننا عشان مخدنهاش معانا فقالت لبابا شايف الحاجات الصغيره اللي جوه عالجزيره دي ياعمو هما دول.رغم اني قلتلهم لو دخلتوا عمو هيزعق بس هما ماسمعوش الكلام طبعا بابا اتنرفز مووت لان الهانم كانت بتسخنوا علينا.

المهم بابا قال للراجل بتاع البدال في ناس جوه عالجزيره ادخل هاتهم فورا فا الراجل قاله بس دول كتير اوي قاله هات البنات بس وسيب الشباب.المهم دخل الراجل وطبعا وقف بعيد عن الجزيره بحوالي 10 متر او اكتر عشان لو قرب اكتر من كده هيخبط في الصخر المهم نادي علينا وقلنا في واحد بره اسمه محمد(بابا)بعتني عشان اجيبكوا وبيقولكوا اخرجوا حالا.طبعا احنا اترعبنا وقلنا بابا هيعلقنا لما نخرج.المهم نزلنا من الجزيره عشان نوصل للمكان اللي واقف فيه البدال ونخرج بس كل مانعوم نحس ان البدال بيبعد فعومنا حته كبيره اوي عقبال مانوصله(انا مش عارفه بابا كان باعته يعزبنا ولا بعته ياخدنا)ومش عايزه بقي اقولكوا علي مناظرنا واحنا بنطلع البدال بما ان مفيش ارض تحت تنط عليها عشان تمسك فيه بصراحه كان شكلنا تحفه وخاصه انا وياسمين

المهم خرجنا ولقينا بابا عاملنا احتفاليه ده الي جانب التكشيره .وطبعا خارجين كاننا عاملين عامله .المهم بابا قلنا تعالوا بقي انا عايزكوا.ليه يابابا.تعالوا بس

طلعنا قعدنا عالشمسيه قلنا لا ده انا محضرلكوا حتته مكان تعااااااااااااالو

راح كده وقف في حته ورا خالص بعد الشماسي وقلنا اتفضلوا اقعدوا

بابا:قعدوا هنا بقي في الشمس

دينا:ياعمو الجو حر اوي

بابا:منا عارف بردوا مش هتقوموا

انا:يابابا الرمله سخنه موووت

بابا:احسن عشان تتعلموا الادب

اسماء :خلاص ياعمو اخر مره

بابا:طبعا اخر مره وهو حد فيكوا هيعملها تاني

انا:بابا انت عارف انا اكتر واحده مش بحب الشمس

بابا:منا عارف ياحبيبتي عشان كده جبتك هنا مخصوص

بابا:الساعه دلوقتي اربعه الا تلت هتقوموا من مكانكوا الساعه 5

مروه:خليها الساعه 6 ياعمو(ماهي مش خسرانه حاجه ماهي مش متعاقبه معانا وقاعده تحت الشمسيه)ماشي يامروه

بابا:لا كفايه 5 يامروه احنا مش بنعذب كفار

اودي:طيب ياعمو اروح الحمام

بابا:لا اعمل مكانك

بعذء:خلاص ياعمو انا ماليش ذنب انا قلتلهم بلاش

بابا:اللي هيتكلم فيكوا هيترحل علي مصر

ياسمين :ياعمو في اشعه فوق بنفسجيه وممكن نموت

بابا:انا عايزكوا تموتوا.تموتو هنا احسن ماتموتو غرقانين جوا

ياسمين:ياعمو متخافش احنا كنا مئمنين نفسنا وقرينا الفاتحه واتشاهدنا قبل ماندخل

بابا:يافرحتي.والله؟ طب عشان كده بقي انا مش هقومكوا

بابا:وانتي يازفته انتي مش عندك برد وكحه ايه اللي دخلك جوا

انا:لا يابابا منا خفيت

المهم عدت كده تلت ساعه وبابا قلنا يالا قوموا عفونا عنكوا

وطبعا البلاج كله بيتفرج علينا

وجه بليل ولقيت ماما بتصحيني من النوم يلا عشان هننزل مصر ليه ياماما ايه اللي حصل محنا كنا قاعدين

ومين اللي قال ننزل مصر.ده بابا

روحت لبابا ليه هنسافر يابابا قالي عشان عملتكوا السودا بتاعت انهارده ان خلاص اصدرت قرار الرجوع

وفجأه وبدون سابق انظار قررنا الرحيل

وانا طبعا في انتظار قرار العوده تاني.شد حيلك يابابا