عشان انت مصرى لازم تعاني
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف
تحياتي لاحمد فؤاد نجم
انا معاه فكل اللي بيقولو بس ماعادا اخر كلمتين
انا شخصيا فخوره جدا بمصريتي رغم كل المهازل اللي بتحصل
3 comments:
هاي يا حنان
علشان انا مصريه انا رافضه كل كلمه كتبها الشاعر المحترم احمد فؤاد نجم
لاء احنا شعب عنده كرامه وعزة
ومش مشكلتنا ان الشاعر ماعندوش مايه في بيته او الصابون خلص من عندهم
لاء احنا شعب نضيف اووي
مانكرش ان في حياتنا بعض السلبيات بس دا ما يدوش الحق ان يقول علشان انت مصري يبقى كتك القرف
كته ستين قرف هو
انا مش بشتمه على فكرة مش هو اللي قال ولا هو مش مصري
ولو متبري من جنسيته علشان يشيل عن نفسه القرف يبقى يسبها لناس اللي بيحبوها وعارفين يعيشوا فيها وبيحاولوا يعدلوها مش بالكلام والشاتيم لاء بالفعل
عيب اوي يا احمد يا فواد يا نجم
ازيك يا حنان
انا الى حد ما مش متفق معاه فى الكلام اللى بيقوله فى الاخر هو اينعم المواطن المصرى بيتبهدل فى كل حاجة بس و الله و انا لاحظتها انه اهم حاجة عنده الكرامة و عزة النفس اللى تقريبا المواطن المصرى الغلبان ما عندوش غيرها
و تعقيبا على كلام مروة لانى شايف انها مزعلة نفسها اوى انا شايف انا اكتر من نص القصيدة ده واقع و هو ده اللى حاصل و فين الناس اللى هتغيرها ده اللى بيتكلم كلمة حق ما بنشفهوش تانى بس ده ما يمنعش ان فى ناس بتحاول تصلح الوضع شوية بس انا شايف انه ما فيش فايدة طول ما اللى فوق ما بيتغيروش
و انا شايف ان احنا وصلنا لمرحلة ان اللى يعرف يفلت بجلده من اللى بيحصل فينا ده يفلت و ما يحاولش يفكر فى اللى حوليه علشان ما يتعبش بس كل اول و له اخر و المصرى متعود على كده
طبعا لو حبينا نتكلم عن مشاكل المواطن المصرى يبقى عايزين نرسخ حياتنا كلها لكده
و ادينا عايشين
zuma
والله ياجماعه انا كمان زعلت لما شتم المصريين.بس الراجل بردوا مقالش اي كلمه مبتحصلش.كل البلاوي دي بنشوفها كل يوم
Post a Comment